பயன்பாட்டில் இல்லாத ஆழ்துளை கிணறுகள் கணக்கெடுப்பு தீவிரம்! மழைநீரை சேமிக்க மாவட்ட நிர்வாகம் நடவடிக்கை

இதுகுறித்து சூலுார் ஒன்றிய வட்டார வளர்ச்சி அலுவலர் முத்துராஜூ கூறியதாவது:

கலெக்டர் மற்றும் ஊரக வளர்ச்சி முகமை திட்ட இயக்குனரின் உத்தரவின் பேரில், அனைத்து ஊராட்சிகளில், அரசு மற்றும் தனியார் இடங்களில் உள்ள பயன்பாட்டில் இல்லாத ஆழ்துளை கிணறுகள், தன்னார்வலர் குழுவினால் கண்டறியும் பணி நடக்கிறது. அதேபோல் கட்டடங்கள், வீடுகளில் உள்ள மழை நீர் சேகரிப்பு அமைப்புகளும் கண்டறியப்பட்டு அவற்றை புனரமைத்து மழை நீரை சேகரிக்க முடிவு செய்யப்பட்டுள்ளது.மழை நீர் சேகரிக்க சாத்தியக்கூறு இருக்கும் அரசுக்கு சொந்தமான இடங்களில், அரசு செலவில், மழை நீரை சேகரிக்கும் வகையில் கட்டமைப்பு ஏற்படுத்தப்பட உள்ளது.

தனியார் இடங்களில், விவசாய நிலங்களில் உள்ள ஆழ்துளை கிணறுகளை, அவர்களே மழைநீரை சேகரிக்கும் கட்டமைப்பை அமைக்க வழிகாட்டுதல்கள் வழங்கப்படும். இயலாத நிலையில் உள்ளவர்களுக்கு, நிறுவனங்களின் சமுதாய பங்களிப்பு நிதி வாயிலாக கட்டமைப்பு உருவாக்க உதவிகள் செய்யப்படும். இவ்வாறு, செய்வதன் மூலம், மழை நீர் வீணாகாமல், சேமிக்கப்பட்டு, நிலத்தடி நீர்மட்டம் உயர வழி ஏற்படும்.

இவ்வாறு, அவர் கூறினார்.

மகத்தான திட்டம்:

ஒவ்வொரு துளி மழை நீரும் எதிர்கால சந்ததிக்கு முக்கியமாகும். அவற்றை நாம் இன்று சேமித்தால் தான், எதிர்காலத்தில் அவர்களுக்கு பயன் கிடைக்கும். மழை நீரை பயன்பாட்டில் இல்லாத ஆழ்துளை கிணற்றில் சேமிக்கும் போது, அப்பகுதியை சுற்றிலும் நிலத்தடி நீர்மட்டம் கணிசமாக உயரும், என, தன்னார்வலர்கள் கூறினர்.